දෙදෙනකු සාර්ථකව විවාහ දිවියට එළැඹ එය පවත්වාගෙන යැමට නම් ඔවුනොවුන් අතර ඇතිවන්නා වූ අවබෝධයක්‌ ප්‍රධාන වශයෙන්ම තිබිය යුතුය. අවබෝධය නැති තැන සාමය, සතුට, ආදරය, නැති තැන සාමය, සතුට, ආදරය හෝ ප්‍රියමනාප බව මෙන්ම විශ්වාසය ද ඇති නොවනු ඇත. විවාහ දිවියට එළඹීමෙන් පසු ගෙවන ජීවිතයේ සතුට, නොසතුට ගැන අල්ප මාත්‍රයක හෝ අනාවැකියක්‌ පවසන්නට පුළුවන්කමක්‌ වෙතොත් ඒ ජ්‍යෙතිෂයෙන් පමණකි.
එවන් උතුම් ශාස්‌ත්‍රයක්‌ අප සතුව තිබියදී එයට පිටුපා සමහර ඇත්තෝ විවාහ දිවියට එළැඹ පසුව එය කඩා ඉහිරවා ගනී. එසේ නොවන තැන්ද නැතුවා නොවේ. එම කේන්ද්‍ර පරීක්‍ෂා කිරීමෙන් එකිනෙකට ගැළපෙන බව ද අත්දැක තිබේ.
ජ්‍යෙතිෂයට අනුව සාර්ථක විවාහ දිවියක්‌ ගතකරන්නට නම්, යුවතිපතින් දෙදෙනාගේ කේන්ද්‍ර දෙකෙහි ග්‍රහ ගැළපීම විය යුතුය. එහිදී බහු විවාහ යෝග, ස්‌ත්‍රී – පුරුෂ නාශක යෝග ආදියට ප්‍රමුඛස්‌ථානයක්‌ හිමි වේ. තවද හිර බන්ධන, කල් පවතින රෝගාබාධ වේදැයි ද බැලිය යුතුය. මෙකී දේවල් සමඟ දරුඵල වේද? පුරුෂ කේන්ද්‍රයක නම් ස්‌ත්‍රිය පෝෂණය කළ හැකි වත්කමක්‌ වේද? කියා බැලිය යුතුය. චරිතවත් බව, පුද්ගල ප්‍රසන්නතාව මෙන්ම දෙදෙනාගේ වෘත්තිය ගැළපීම ද, යෝජිත පුරුෂයා රහමෙර පානය කරන්නේද යන වගත් කෙරෙහි අවධානය යෙදිය යුතුය.
විවාහයේ ප්‍රමාදය
ඇතැම් කෙනකුගේ විවාහය ප්‍රමාද වන බව කේන්ද්‍රය තුළින් පෙනෙද්දී කල් ඇතිව විවාහ දිවියට එළැඹෙන අවස්‌ථා ඇත. එසේ කරනුයේ ඔවුන් ජ්‍යෙතිෂය කෙරෙහි විශ්වාසයක්‌ නැති නිසාවෙන් විය හැකිය.
විවාහයේ ප්‍රමාදය ජන්ම පත්‍රය තුළින් පෙන්නුම් කරද්දී එකී තැනැත්තා හෝ තැනැත්තිය කල් ඇතිව විවාහ දිවියට එළැඹෙතොත් කුමන හෝ අර්බුදකාරී තත්ත්වයක්‌ ඉස්‌මතු වේ. සමහර විටෙක දික්‌කසාදය පවා සිදුවිය හැකිය. මෙහිදී හීන ආයුෂ ඇති අයකු සමඟ විවාහ දිවියට එළැඹ ඔහු හෝ ඇය මියයැමෙන් පසුව සුදුසු කාලය පැමිණීමෙන් නැවත විවාහ වන අවස්‌ථා ද දැකිය හැක.
තවත් විටෙක විවාහය සිදු වූ මුල් වකවානුව තුළ නොයෙක්‌ ගැටලුකාරී තත්ත්වයන්ට මුහුණදී පසුව යහපත් ලෙස කාලය ගෙවයි. එහෙම වන්නේ විවාහය ප්‍රමාද විය යුතු තැනට එනතෙක්‌ ඒ ගැටලුකාරී බව පැමිණ විවාහය සිදුවිය යුතු වයසේ සිට එය ඉවත්ව යන නිසාවෙන් යෑයි සිතිය නොහැකිද?
පොරොන්දම් පරීක්‍ෂා කරන ජ්‍යෙතිර්වේදියා ලවා ඉහත කී අශුභ තත්ත්වයන් ඉස්‌මතු වේද කියා සේවය ලබාගන්නා ඔබ විසින් අසා දැනගත යුතුය. නැතත් ජ්‍යෙතිර්වේදියකු සතුව එම වගකීම වෙයි. මා ඔබට එම වගකීම පවරන්නේ මුදලට තැනදී සිටින ඇතැමුන් විසි පොරොන්දම් පමණක්‌ බලා නතර වන නිසාවෙනි. එය නොමනා ක්‍රියාවකි. එහෙයින් විසි පොරොන්දම් පමණක්‌ ගලපා විවාහයට පෑහේ යෑයි තීරණය කිරීමට ඉක්‌මන් විය යුතු නොවේ.
We found this article from Divaina on 2013/12/01.
About The Author
