දඹුල්ල ජයන්ට්ස් පරදවමින් ජැෆ්නා කිංස්ග් පළමු ජය ලබයි..

ලංකා ප්‍රිමියර් ලීග් ක්‍රිකට් තරගාවලියේ සිව්වැනි තරගයෙන් කඩුලු 8ක ජයක් වාර්තා කිරීමට ජැෆ්නා කිංග්ස් කණ්ඩායම ඊයේ (7) සමත් වුණා.ඔවුන් හමුවේ පරාජයට පත් වූයේ දඹුල්ල ජයන්ට්ස් කණ්ඩායමයි. පළමුව පන්දුවට පහරදුන් දඹුල්ල ජයන්ට්ස් කණ්ඩායම පන්දුවාර 19.3ක් අවසානයේ සියලු දෙනා දැවී ලකුණු 110ක් ලබා ගත් අතර පිළිතුරු ඉනිම ක්‍රීඩා කළ ජැෆ්නා කිංස්ග් කණ්ඩායම පන්දුවාර 12.3ක් අවසානයේ කඩුලු 2ක් පමණක් දැවී ජයග්‍රාහී ඉලක්කය පහසුවෙන් පසු කර ගියා.

දඹුල්ල කණ්ඩායම වෙනුවෙන් ඉනිමේ වැඩිම ලකුණු ලාභියා වූ නුවනිදු ප්‍රනාන්දු ලකුණු 23ක් රැස් කළා. චාමික කරුණාරත්න ලකුණු 18යි.

ජැෆ්නා කණ්ඩායම වෙනුවෙන් විශිෂ්ඨ පන්දු යැවීමක නිරත වූ මහීෂ් තීක්ෂණ ලකුණු 22කට කඩුලු 3ක් දවා ගත් අතර වනිදු හසරංග ලකුණු 16කට කඩුලු 3ක් ද , සුරංග ලක්මාල් කඩුලු 2ක් දවා ගත්තා.

ජැෆ්නා කණ්ඩායම වෙනුවෙන් ඉනිම ආරම්භ කළ අවිශ්ක ප්‍රනාන්දු හයේ පහර 3ක් හා හතරේ පහරක් සමගින් පන්දු 27කින් ලකුණු 33ක් රැස් කළා.ටොම් කොහ්ලර් කැඩ්මෝර් පන්දු 30කින් නොදැවී ලකුණු 45ක් ලබා ගත් අතර, ෂොයිබ් මලික් පන්දු 10කින් ලකුණු 26ක් නොදැවී රැස් කළා.

දඹුල්ල කණ්ඩායම වෙනුවෙන් පන්දු යැවීමේ දී ඉම්රාන් තහීර් හා නුවන් ප්‍රදීප් එක් කඩුල්ල බැගින් දවා ගත්තා.