නිවසක්‌ ඉදිකිරීමේ දී ප්‍රධාන දොර තබන ස්‌ථානය කෙරෙහි විශේෂ අවධානය යොමු කළ යුත්තේ ය. පුරාණ වාස්‌තු විද්‍යා නීති – රීතිවලට පටහැනිව ප්‍රධාන දොර පිහිටුවීම ගෙහිමියාට බොහෝ අහිතකර ප්‍රතිඵල ගෙන දිය හැකි බැවිනි. නිවසක්‌ කොතරම් අධික වියදමක්‌ දරා ඉදි කළ ද ප්‍රධාන උළුවස්‌ස පිහිටුවා ඇත්තේ වැරදි තැනක නම් එය නිශ්ඵල වියදමක්‌ විම වැළැක්‌විය නොහැකිය. එබැවින් දැනටමත් නිවසක්‌ සාදා පදිංචි වී සිටින අයගේ මෙන්ම නව නිවසක්‌ ඉදිකිරීමට අපේක්ෂා කරන අයගේද යහපත පතා ප්‍රධාන උළුවස්‌ස පිහිටුවීම පිළිබඳව වාස්‌තු විද්‍යා නීති රීති මෙම ලිපියෙන් සාකච්ඡා කිරීමට බලාපොරොත්තු වෙමු.
නිවසක ප්‍රධාන උළුවස්‌ස පිහිටුවීමේ දී කරුණු දෙකක්‌ කෙරෙහි විශේෂ අවධානය යොමු කළ යුතුවන්නේය. දොර තබන බිත්තියේ නියමිත ස්‌ථානයේ හෙවත් පාදයේ දොර පිහිටුවිය යුතුය. එය පළමුවන කාරණයයි. දෙවැන්න නම් දොර ඉදිරිපිට නොතිබිය යුතු විවිධ දෝෂ සහගත පිහිටීම් වළක්‌වා ගැනීමයි. ඒවාට ද්වාර වේධ දෝෂ යෑයි කියනු ලැබේ. එවැනි දෝෂ දහ අටක්‌ ගැන සඳහන් වේ.
ගේ දොරකඩ සිට එළිය පැත්ත බලනවිට වංගුවක්‌ තිබීම වේද දෝෂයකි. එනම් වංගුවක්‌ පිහිටි පාර අසල පිහිටි නිවසකි. එවැනි පිහිටීමක්‌ ඇති නිවස හෝ වෙළෙඳසලක්‌ දියුණු කිරීම අපහසුය. ගෘහ මූලිකයාට විවිධ කරදර ඇතිවේ.
එමෙන්ම දොරට හරි කෙළින් ළිඳක්‌ පිහිටීම ද වේද දෝෂයකි. එවැනි පිහිටීමක්‌ ඇති නිවසක පදිංචි අය නිතර රෝගීන් වනවා ඇත. එමෙන්ම ප්‍රධාන දොර ඉදිරිපිට මඩවලක්‌ පිහිටීම ද අශුභය. එවැනි නිවසක පදිංචිකරුවන් නිරන්තරව නින්දා අපහාසවලට භාජනය වනවා ඇත. එසේ පිහිටා ඇත්නම් ඉක්‌මනින් එය වසා දැමීමට කටයුතු කළ යුතුය.
සමහර ගෙවල් ඉදිරියෙන් ශබ්ද නඟා ගලා යන ඇල දොළ පවතී. එසේ ශබ්ද නඟන දිය පහරක්‌ ගලා යැමද මලදොලක්‌ තිබීමද වේධ දෝෂ වේ. මල දොල යනු වර්ෂා කාලයට පමණක්‌ ජලය ගලා යන ඉන්පසුව වියලෙන ජල මාර්ගයයි. මෙවැන්නක්‌ ප්‍රධාන දොර ඉදිරිපිට ඇති අය ස්‌ථිර දියුණුවක්‌ ලබන්නේ නැත.
එමෙන්ම ප්‍රධාන දොරට හරි කෙළින් දේව රූපයක්‌ හෝ බුද්ධ ප්‍රතිමාවක්‌ තිබෙන ලෙස දොර තැබීම ද අශුභය. විවිධ කරදර ඇතිවන බැවිනි.
ප්‍රධාන උළුවස්‌සට හරියට ඉදිරියෙන් කණුවක්‌ හෙවත් ස්‌ථම්භයක්‌ තිබීමද වේධ දෝෂයකි. සමහර අය ගෘහ නිර්මාණය කරන විට තමා විසින්ම එවැනි කණු පිහිටුවා ගෙන තිබේ. මෙයට ස්‌ථම්භ මේධ දෝෂය යෑයි කියනු ලැබේ. මෙම දෝෂය ඇතිවිට ගෙදර අයට නිතර අසනීප ද තද ඊර්ෂ්‍යාකරුවන්ගේ සතුරුකම්ද ඇතිවේ.
සොහොනක්‌ නැතහොත් සුසාන භූමියක්‌ ඉදිරියෙන් සිටින අන්දමට දොර තැබීම ද දොස්‌ සහිතය. එවැනි අයට තමන්ගේ ගෙදර සථිර වාසයට ඉඩ නොලැබීම හා දෝෂ ඇතිවීමට ඉඩ තිබේ.
ඉදිරියෙන් ඇති නිවසක බිත්ති මුල්ල නැතහොත් මායිමේ මුල්ලට හරි කෙළින් තිබෙන සේ දොර පිහිටුවීමද ශුභ නැත. එමෙන්ම වෙනත් නිවසක දොරට හෝ ගේට්‌ටුවට හරියටම ඉදිරියද දොර අශුභය. ඊර්ෂ්‍යාකරුවන් හා ප්‍රේත දෝෂ ඇතිවන බැවිනි.
ප්‍රධාන දොරට හරි කෙළින් කසල ගොඩක්‌ තිබීම ඉතා අශුභය. එමගින් නින්දා, අපහාස ලඡ්ජාවීම සිදුවනවා ඇත.
තවද හරකෙක්‌ හෝ බල්ලෙක්‌ බඳින තැනක්‌ හෝ කුකුල් කූඩුවක්‌ වැනි තිරිසන් සතුන් සිටින තැනක්‌ද දොර ඉදිරිපිට තිබීම වේධ දෝෂයකි. නිවැසියන් තුළ මෝඩකම හා පහත් ගති ඇතිවීමට එය හේතු වේ. රෙදි සෝදන තැනක්‌ එසේ පිහිටියේ නම් එම නිවසේ අයට උසස්‌ වීමට බොහෝ බාධා පැමිණේ.
ප්‍රධාන දොර ඉදිරිපිට වලං හෝ ගඩොල් පුච්චන තැනක්‌ තිබීමද වේධ දෝෂයකි. එයින් අධික වියදම මෙන්ම අවාසනාවන්ත බව ද මතුවේ. ගණිකා මඩමක්‌ එලෙස පිහිටීම දරුවන්ට අකල් මරණ ගෙන දෙන බව කියෑවේ. ඉදිරිපස පිහිටි වෙනත් ගෙදරක මුදුන් යටලීයට හරි කෙළින් ප්‍රධාන උළුවස්‌ස තැබීමද දෝෂයකි. එවැනි අයට උසස්‌ අයගේ ආධාර, උපකාර නොලැබේ.
එමෙන්ම තමන්ගේම නිවසේ මුදුන් යටලීයට හරි කෙළින් උළුවස්‌සක්‌ තැබීම ද අශුභය. එසේ වන්නේ මුදුන් බිත්තියකට දොර තබන විටය. තවද දොර උළුවස්‌ස හරි මැදට හෝ උළුවහු කනු දෙකට හරියට ලම්බක වන සේ පරාල, කලාන්. බාල්ක ආදිය යෙදීමද ඉතා අශුභය.
ප්‍රධාන උළුවස්‌සේ ගෙදර ප්‍රධානියාට විශේෂ බලපෑමක්‌ ඇතිකරවයි. එනිසා එම උළුවස්‌සේ හා දොර පියන ගෙදර අනෙක්‌ උළුවහු හා දොර පියන්වලට වඩා ශක්‌තිමත්ව හා අලංකාර ලෙස නිර්මාණය කළ යුත්තේය.
ගෘහ නිර්මාණයේ යෙදෙන සියලු දෙනා ඉහත ද්වාරවේද දෝෂ නොයෙදෙන අන්දමට ප්‍රධාන දොර පිහිටුවා ගැනීම ඉතා වැදගත් වන්නේය.
මෙයින් පසුව අවධානය යොමු කළ යුත්තේ දොර තැබීම සඳහා බිත්තියේ සුදුසුම ස්‌ථාන තෝරා ගැනීම පිළිබඳවයි. මෙය දොර තබන දිශාව අනුව තීරණය කරනු ලැබේ. මේ අනුව නැගෙනහිර, බටහිර උතුර දකුණ යන ප්‍රධාන දිශා හතර පමණක්‌ දොරවල් තැබීම සඳහාය. අනු දිශාවන ඊසාන, ගිණිකොණ, නිරිත හා වයඹ යන දිශාවන්ට දොරවල් තැබීම ශුභ නැති බව සැලකිය යුතුය.
දොර තැබීමට අදහස්‌ කරන දිශාවට පිහිටි බිත්තිය සමාන කොටස්‌ අටකට බෙදාගත යුතුය.
නැගෙනහිර දිශාවට ප්‍රධාන දොර පිහිටුවන්නේ නම් ගේ ඇතුලේ සිට එළිය පැත්ත බලනවිට දකුණු අත පැත්තේ පාද හතරද වම් අත පැත්තේ පළමුවෙනි පාදය ද අත්හැර ඉතිරි පාද තුනේ දොර තැබීම ශුභය.
දකුණු දිශාවට ප්‍රධාන දොර පිහිටුවන්නේ නම් ඉහත දැක්‌වූ පරිදි කොටස්‌ අටට බෙදා වම් අත පැත්තේ පාද තුනක්‌ ද දකුණු අත පැත්තේ කොටස්‌ හතරක්‌ද අත්හැර ඉතිරි කොටසේ පමණක්‌ දොර තැබීම ශුභය.
බටහිර දිශාවට දොර පිහිටුවන්නේ නම් ඉහත පරිදි කොටස්‌ අටකට බෙදා දකුණු පැත්තේ පාද තුනක්‌ද වම් පැත්තේ පාද තුනක්‌ ද අතහැර මැද කොටස්‌ දෙකේ දොර පිහිටුවීම ශුභය. එහෙත් මෙහිදී බිත්තිය හරිමැද දොර පිහිටුවීම අශුභ බව මතක තබා ගත යුතුය.
උතුරු දිශාවට දොර පිහිටුවන විටද ඉහත පරිදි කොටස්‌ අටට බෙදා දකුණු අත පැත්තේ කොටස්‌ තුනක්‌ද, වම් ඇත පැත්තේ කොටස්‌ දෙකක්‌ද අත්හැර ඉතිරි කොටස්‌ තුනේ දොර පිහිටුවිය යුතුය. මෙහිදී ද හරිමැද අත්හල යුතුය. ඉහත දැක්‌වූ ලෙස පාද බෙදූ විට දිශා හතරටම සුදුසු හෙවත් ගැලපෙන ක්‍රමයක්‌ද තිබේ. මේ පිළිබඳව පුරාණ පළදාවලිය නම් ග්‍රන්ථයේ එන කවිය පහත පරිදිය.
ගෙයි දිග බෙදමින් නවයට සතර විදිය දැන සොඳ ලෙස
ඉන් දකුණට පසක්‌ ද වමතට තුන් බාගයක්‌ සලස
මින් සෙසු තැන බලා සොඳින තබනු ගෙදොර කඩ සිතුලෙස
සන්තොස ලෙද වැඩ සෑදී විසුම වේය කලොත් මෙලෙස
එනම් ඉහත දැක්‌වූ ලෙසටම ගෙයි දිග නවයකට බෙදන්න. වම් පැත්තට කොටස්‌ තුනක්‌ද දකුණු පැත්තට කොටස්‌ පහක්‌ද අත්හරින්න. ඉතිරි කොටස්‌ දොර තැබීමෙන් ශුභඵල ලැබේ. මේ ක්‍රමය සතර දිශාවටම ගැලපේ.
නිවසක පිටවන දොරවල් පිහිටුවීමද වාස්‌තු විද්‍යාවට අනුකූල විය යුතුය. එනම් ප්‍රධාන දොර පිහිටුවූ දිශාවට අනුව පිටුපස දොර තිබිය යුතුය.
නිවසට දොරවල් තබන විට ඉදිරිපස හා පිටුපස දොරවල් වල දිශා නොගැලපේ නම් අශුභඵල ඇතිකරවයි. නැගෙනහිර හා දකුණ යන දිශා දෙකට දොරවල් තබා ඇත්නම් ඒකාන්තයෙන්ම එම නිවස ස්‌ත්‍රීන්ට හානිකරය. එමෙන්ම බටහිරට පමණක්‌ දොරවල් ඇති නිවස සියලු සැප හා සම්පත් විනාශ කරයි. උතුරට පමණක්‌ දොර ඇතිනම් නිවස ගෙහිමියාට අප්‍රිය වනු ඇත. නැගෙනහිර හා උතුර යන දිශාවට දොරවල් දෙකක්‌ තබා ඇති නිවස සියලු දුක්‌ ගෙන දෙන්නේ යෑයි කියා තිබේ. උතුර හා දකුණ යන දිශා දෙකට පමණක්‌ දොරවල් තැබූ නිවස නිතර සතුරු කරදවලට පත්වනු ඇත. උතුර හා බටහිරට දොරවල් තැබූ නිවස සියලු අපේක්ෂා විනාශ කරවයි. නැගෙනහිර, බටහිර හා උතුර යන දිශා තුනටම දොරවල් තැබූ නිවස ශෝකය ඇතිකරවයි.
ඉහත දැක්‌වූ පරිදි ප්‍රධාන දොර තබන විට දිශාවට අදාළ පාදය තෝරාගත යුතුය. එම පාදයේ ශුභ ලෙස දොර තැබිය යුතු අතර ද්වාර වේධ දෝෂ වළක්‌වාගත යුත්තේය. එමෙන්ම ප්‍රධාන දොර තැබූ දිශාවට ගැපෙන සේ පිටුපස දොර තැබිය යුතුය. සතුට සම්පත නොඅඩු නිවසක්‌ නිර්මාණය කර ගැනීමට මේ පුරාණ නීති රීති ඔබට මහත්සේ උපකාර වන බව අපේ විශ්වාසයයි.
About The Author
